زوجي يهددني ببيت ابوي
السلام عليكم
أنا عمري 27 متزوجة لي 3 سنوات وعندي ولدين وبي يحفظهم
أنا عائلتي غنية ولله الحمد وكنت عايشة أميرة ومدللة وتقدم لي زوجي وظروفه المادية صعبه طبعا انا مافكرت في المادة لأنها ماكنت تهمني
اللي كان يهمني أخلاقه وفعلا هو كانت سمعته طيبه والحمدلله تم الزواج لكن بعد الزواج تعبت من شغل البيت والمسئولية وهو صبر علي وكان مقدر ظروفي وكانت تصير بيننا مشاكل وخلافات لكننا نرجع ونتصالح لكن اللي قاهرني الحين الفترة الأخيرة كل ماصارت مشكلة يهددني يرجعني بيت ابوي
مثلاً لما ولدت زوجة أخوه كنا وقتها متزاعلين على مشكلة تافهه جاء عندي وقال جهزي ثيابك بكرا بوديك لبيت اخوي عشان تخدميهم اسبوع قلت له كذا على طول جهزي ثيابك ليش انا خدامه عندكم مستحيل اروح واذا انت منحرج منهم راح أرسل لهم شغاله على حسابي لمدة أسبوع طبعاً هو رفض وقال حنا بيوتنا ماتدخلها الشغالات وقال اذا رفضتي جهزي ثيابك اوديك لبيت ابوك
طبعا انا وقتها ماهمني ورحت اجهز ثيابي ودقيت على اختي بس اختي هدتني وقالت تعوذي من الشيطان لاتخربين بيتك على شي تافه وكلها اسبوع ومنها تكسبي لك اجر انا سمعت كلامها ورحت اليوم الثاني لبيت اخوه وجلست عندهم تقريباً 10 ايام انظف وامسح واكنس واولادي اهملتهم لأني ماعرفت اوفق بينهم وبين شغل بيتهم وبعدها رجعت لبيتي وباسني ع راسي وقال سامحيني كنت مجبور ارسلك لبيت اخوي ،لأن امه دقت عليه وتقول له لازم ترسل زوجتك لبيت اخوك ( امه كانت مسافرة )
قلت له اوكي سامحتك بس والله الى الحين ماقدرت اسامحه غصب عني
وبعد فترة سافرت لأهلي زيارة وانا متعودة اطلع مع اختي الصغيرة عمرها 20 مع السواق بروحنا وهالمرة قال لي لاتطلعين مع السواق الا مع امك او اختك الكبيرة انا في البداية سكت وبعد يومين ارسلت له أستأذن منه اطلع مع اختي الصغيرة هو رفض وقلت له عطني السبب قال لي بدون سبب كذا بمزاجي وهددني اذا طفشت فيه راح اشوف منه شي مايسرني
وبعدها بأيام ارسلت له انه كلما بدأ قلبي يصفى من ناحيتك بأسلوبك تخليني احقد عليك
هو دق علي وكان معصب ويقول انا الحين لمين اتعب واشقى مو عشانك انت وعيالك وانت حاقده علي قلت له لاتدخل المواضيع في بعض عطني السبب تمنعني اطلع مع اختي الصغيرة قال افرضي لو صار لكم حادث الناس راح تقول مين كان مع السواق بيقولون زوجة فلان واختها الصغيرة ، انا وقتها سكت لأنه اهم شي اعطاني سبب مو بس كذا بمزاجه
وبعدها قال لو طفشتي فيني في هالموضوع او موضوع ثاني والله لأخليك في بيت ابوك إلعن شكلك يا كلبة وسكر في وجهي .
انا ظليت مصدومة ومقهورة في نفس الوقت
اش اسوي عندي طفلين وانا مابي اهدم بيتي على اشياء تافهه وهو قاهرني ليش يهددني ع الرايحه والجيه
مو لذي الدرجة كل ماتصير مشكلة هددني ببيت ابوي
لاحول ولاقوة الا بالله
على فكرة هو بصراحه لما يصير راضي علي يصير طيب وحنون وابداً مو عصبي وعايشه معاه بالمعروف ومو مقصر معاي بمصاريف البيت طبعا باللي يقدر عليه بس وقت المشاكل يصير شخص ثاني وهالفترة ماسكه معاه يهددني ببيت ابوي وانا مو حابه أدخل اي احد من اهلي بمشاكلنا لأني عارفه راح تكبر المشاكل وهي بذاتها تافهة وماتستاهل احد يتدخل
ربي يجزاكم خير ارشدوني .
