خطبني من 5سنين وابغى افصخ الخطوبة
السلام عليكم
اكتب مشكلتي وانا مخنوقة
من فين ابدأ؟
أنا طالبة ادرس جراحة واهتم بدراستي اكثر من اي شي من 5 سنين أتقدملي قريبي مواصفاته أقل من عادية خريج ثانوي ووظيفة بسيطة وشكله مقبول اكبر مني ب8 سنوات، ورفضت وبكيت قبل مااعرف حتى مين الي خطبني لاني مو مستعدة ومابغى اتزوج، بس بالزن من أهلي قلت طيب مين؟ وبدأت اتقبل باقناعاتهم المتواصلة وكلامهم لو غيرك تفرح ولو غيرك الخ.. ماتصدقوا قد ايش قعدوا يزنوا ويجيبولي هدايا وحتى موعد الشوفة كان بالإجبار ومفاجأة ليا صحوني يقولوا الرجال في الصالون البسي وادخليله!! وقتها دخلت الحمام بكيييييت من قلبي ولمن دخلتله بدون نفس وبدون مكياج وامي تقلي عالاقل حطي روج وتمسح خدودي بالاحمر وانا ادعي مااعجبه وكرهانة اهلي
ويومها قالتلي أمي لمن شافتني متنكدة من حركتهم بعد ماراحوا اهله: "لو شفتي منه شي افصخي الخطوبة لأنه مافي شي رسمي الأن" كانت تسكتني بس لاني ماعرف ايش قصدها لو شفتي منه شي! لانه ماكان في اي تواصل ولا اي كلام بيننا بعد الشوفه وحتى الشوفة كانت كلها 5 دقايق في حضور اهلنا ولا كلمة بيننا حتى صوته ماسمعته!!
مرت الخمسة سنين ولا ادري عنه اي شي ولا نفتح الموضوع (علاقتنا في البيت سطحية جدا جدا بين بعض) وأنا مطنشة وكنت ادعي انه الي خطبني يبطل ولا ينسوا (من اليأس ادعي) او يغير رأيه لأني اتوقعت اني ماعجبته في الشوفة
لكن قريب امي تقلي يبغوا الملكة بعد شهر
حاولت ااجلها بعذر الاختبارات وبكيت كالعادة وكلمتهم بالقوة ومستقبلي ومااقدر واجلوها لأجل غير مسمى..
من فترة دخلت على حساب عمي في برنامج تويتر ولقيت عنده خطيبي بالصدفة قمت بالفضول لا اكثر دخلت صفحته ولقيته يكتب لبنات كلام غير لائق اعطيكم امثلة: وحشتيني ، فينك مختفية؟ زعلانة ياحلوة؟، ووحدة كاتبة مااحب الرجال كاتبلها الا انا اجيبك ياسرونتي وكلام من هذا القبيل حسيت اني قرفت من الانسان هذا اكثر
الان المشكلة هي كيف اقنع اهلي بفصخ الخطوبة؟ هل اقدر اقلهم عالكلام اللي شفته؟ يقتنعوا؟ ولو اقتنعوا ايش ممكن يقولوا لأهل خطيبي بحيث مايزعلوهم لانهم اهل واخاف اكون سبب في مشاكل وانا ماابغى اشوه صورته قدام اهلي واهله لكن هوا كاتب الكلام بإسمه ومتاكدة انه حسابه من صوره والمضافين عنده اهلنا يعني الادمي علني يكتب أنا صورت الكلام لانه الوسيلة الوحيدة اللي ممكن تقنعهم لكن اخاف تضره او او تسببله مشاكل
*انا صليت استخارة ومن قبل مااشوفه ما ارتحت ولا بعدها ولا الان… وحاسة اني استاهل اكثر واني حااتطلق منه في اول شهر لو اتزوجته..
قلت استشيركم قبل مااسوي شي
وجزاكم الله خير
