غلطات تسويها قدام زوجك

هذي نصايح من خلال تجربتي وخبرتي المتواضعة كتبتها لكل زوجه تحرص على ان تكون حياتها سعيدة ومميزة..اتمنى ان تكون واضحه ومفيدة..

· رفع الصوت سواء بزعل او مزح او حتى الكلام معه بصوت عالي ومزعج…
· مزح بكثره وبدون حدود لدرجة توصل استهزاء في شخصيته وشكله بكذا ينعدم احترامه لكي ويبدأ يجرح فيكي
· الكلام عن الناس وخاصة عن اخواتك وحريم اخوانك وسلفاتك ووصفهم تخليه يعجب او يتعلق بوحده فيهم وانتي ياغافل لك الله
· توصفي نفسك قدامه بوصف قبيح مع الايامم حيشوفك بنفس القبح الي وصفتي نفسك فيه مثلا (سرت دبه..او كرشتي كبيره او لوني اسمر..الخ..او تسبي نفسك اوتشتميها قدامه..مثلا:انا هبله ..انا غبيه..انا خواافه..انا شكلي غير عن البنات..

· كثرة الكلام والشكوى على راسه من يوم يجي ومن الدوام الين ينااام تخليه ينفر منك(حاولي تلخصي كلامك في كلمتين مختصره ومفيده وحاولي تنهي الحديث انتي قبله )
· كثرة انتقاده وكثرة احراجه وخاصة امام الاولاد او اهله او أي احد من الناس او حتى لو كان مو قدام احد(تخليه يحس بعدم احترامك له..
· عدم احترام اهله وسبهم وشتمهم واظهار كراهيتك لهم سواء بسبب او بدون..
· تقولي له رأي صديقتك او اختك او أي احد فيه..مثلا(صديقتي تقول عنك حلو ولا كريم ولا سألتني عن عطرك…انتبهي

· تقولي له رأي صديقاتك وصحباتك او حتى اخواتك او حتى اخواته فيكي..مثلا اخواتك يقولولي اني مرره قصيره و دبه او سمرره او نحيفه او ما يحبوني..
· تتكلمي قدامه في الناس بمشاعرك الحقيقيه (السلبيه) ..بكذه حتكوني دائما خسرانه وراح يكون بصف خصمك دائما لأنه حيقول في نفسه :هذي ما تحب احد وشكلها حقوده وحسوده..ولا تنسي انه العكس افضل

· انتبهي تمدحي زوجك في شكله..وايضا لا تنتقديه في شكله خليكي وسط معاه دايما حتى لو اخذ رأيك في شكله خلي ردك بسيط وقليل مثلا..شكلك انيق..وبس ما تكثري
· لا تحاولي تعبري و تشرحي لزوجك كل احاسيسك تجاهه اتركيله مساحه يفكر فيك شويه ويكتشف ويبحث
ويستنتج

· لاتحاولي تستدري عطف زوجك وتمثلي عليه دور الحزينه ولا المريضه ولا الباكيه.. حتى لو نجحتي في ذلك لأنه راح يعيش معاكي اكثر ويعرفك اكثر ويكتشفك ..
· لاتتنازلي عن أي حق من حقوقك ابدا مهما كان والا اصبحتي انتي الخسرانه دائما..
· سؤالك لزوجك عن شكلك ورأيه في لبسك ولوكك وطبخك او أي شي..يشعره بعدم ثقتك بنفسك..

· العبوس عند الاستيقاظ من النوم..انتبهي..ولابد من الابتسامه..
· وضع المكياج المبالغ فيه..او في اوقات غير مناسبه..
· الاطاله في التحدث في التلفون اثناء تواجده..حاولي الاختصار في المكالمه قدر الاستطاعه..
· تكرار الحديث والقصص نفسها يجعل من حديثك ممل· فتح مواضيع مع زوجك في وقت غير مناسب..والنقاش والجدال ايضا على مواضيع تكون تافهه وما تستاهل كل هذا الجدل..

· عند ذهابك لآي مناسبه سواء عزومه او عرس او حفله احذري التأخر في الخروج و زوجك ينتظرك في الخارج هذا الشي يخليه يحرم يطلعك او يوديك أي مكان بعد كذه

· عند الذهاب للسوق مع زوجك لاتسأليه ايش اخذ..لكن ممكن تسأليه ايش رايك في هذا بس مو كل شي تمسكيه تسأليه عنه لأنه راح يلاحظ عليكي عدم ثقتك نفسك وقلة خبرتك في الشراء.حاولي تكتبي ايش محتاجه في ورقه وحاولي تحطي مواصفات معينه في بالك تبحثي عنها عشان تختصري الوقت وتسألي البائع عن شي محدد مو تقعدي ضايعه وما انتي داريه تدوري عن ايش بالضبط..؟؟تختاري الشي الاول الي جا تحت يدك ويكون عجبك ومو تلفي السوق كله وترجعي لأول لبس اخترتيه..عشان يقول عنك ماشاء الله تعرف تختار وذوقها حلو..وحتى عند ذهابك للسوبر ماركت حاولي تكوني كاتبه كل شي في ورقه مرتبه من دون ما تقعدي تحوسي انتي وياه..

· اذا جلستي معه سواء في السيارة او قدام التلفزيون لاتحاولي تتكلمي وتعلقي على كل شي شفتيه..خليه يواصل تركيزه..(مثلا :لوشفتي الفلم قبله لا تحرقي عليه الفلم وتقوليله الاحداث قبل ما يشوفها ..واذا انتي بالسياره لا تحاولي تتلفتي في السيارات الي حواليك وتأشري على الناس خليكي رزينه وثقيله بس مرحه ونفسك حلوه..

· لاتطلبي زوجك كل شويه طلب..:مثلا نقص عليكي أي غرض من اغراض البيت لاتتصلي عليه كل شويه وتقولي له نسيت اقولك جيب معاك ملح ونسيت اقولك جيب معاك زيت ونسيت اقولك ..الخ ..لازم تشوفي كل الاغراض الي ناقصه وترسلي له رساله كاتبه فيها كل النواقص ولا تنسي في النهايه تدعي له دعوة حلوة تنسيه كل التعب..

· انتبهي تتكلمي عن مشاكل اهلك قدام زوجك وتقولي له عيوب اهلك واخوانك..لأنك راح تهيني نفسك و راح تندمي وهو راح يمسك عليكي نقاط ضعف..خليكي بنت اصول لا تتكلمي عن اهلك الا بكل خير وحب وفخر.. ولا تخلي لسانك يهينك ويوديكي في داهيه
· لاتتكلمي عن ماضيك قبل الزواج قدام زوجك وحتى لو هو اعترفلك..و لو سألك لا تقولي عن نفسك الا كل شي يشرف..انتبهي في بناات كثيرر وقعوا واطلقوا في ثاني يوم من زواجهم..لأنه في رجال عندهم اسلوووب مررره خطيرريستدرج الوحده ويخليها تعترف على نفسها ومهما كان الرجال متحررومنفتح لاتقولي..لأنه الرجال الشرقي عاداته هي هي ما تتغير.

.
· لا تخلي أي احد من اهل زوجك صديق لك تقولي لهم احزانك واسرارك الزوجيه لأنه ممكن كل شي ينقلب ضدك حتى لو كانوا معاكي مررره عسل.. وعشان ما تندمي في يوم من الايام..
· لاتدخلي في بيتك ناس ما تعرفيهم وخاصة الي تكون مو متزوجه او مطلقه..

· اذا جاء زوجك من العمل لا تحاولي تتشكي من الاولاد وتتذمري او تسألي عن الاغراض الي نسي يجيبها ..خليه ياخذ انفاسه ويجلس يرتاح..وبعدين يسير خير
· التدقيق على كل ردة فعل من زوجك سواء في الكلام او الفعل..

· اسئله ما يحبها الزوج مثل:ايش فيك ساكت؟(تخليه يصر ما يقولك شي..تفكر في ايش؟(تخليه يحسك ملقوفه ) فين كنت(تخليه يحسك شكاكه ومريضه)؟ انت تحبني(تخليه يحسك ماعندك ثقه في نفسك)؟ فين رايح؟(تخليه يعاندك ويسير يخبي عليكي او يكذب عليكي)ليش انتظار؟تخليه يقول انتي مراقبته وكاتمه على نفسه)؟وبرضولمن يسألك احيانا ايش اجيب غداء او عشاء؟؟وانتي تردي له وتقولي له جيب أي شي؟(تخليه يقول هذي ما عندها رأي)؟ وبعض الرجال ما يحب الزوجه تسأله ايش اسوي لك فطور او ايش تبغى عالغدا؟(يحس انها مو فاهمه ايش يحب..وانها مو حرمه شاطره ؟ممكن تعطيه خيارات وهو يختار وممكن تسوي الي يحبه دايما بدون ما تسأليه..

· بعض الحريم تبغى رأي زوجها في أي شي تسويه بسرعه وفي نفس اللحظه تبغا تعرف رده واذا ما قال شي او ماسوى ردة فعل.. تزعل وتنكد..وهذا الشي يخليه يحس انك مو واثقه من نفسك اولا وثانيا يخليه يقول عنك نكديه صح..

· بعض الحريم ما تلبس ولا تتعطر الا وقت الخروج او اذا جاء الضيوف..اكيد الزوج بيلاحظ كل هذا وماراح يتكلم..بس بعدين بيسير يدور وحده ثانيه تعطيه الي فاقده..

· تقليد الزوجه لبعض الشخصيات الي يعرفهم زوجها سواء بالصوت او الحركات او في اللبس اوجهات النظر..مثلا تقلد اخته بطريقة الكلام او اختها او صديقتها ويكون الزوج عارفها واصلا عارف حركات زوجته فيحس انه عقلها صغير وما عندها شخصية مستقله ويقلل من احترامه لها..

· اذا كنتي مع زوجك في مكان مختلط وشفتي بنت متبرجه وقاعده تحاول تلفت نظر زوجك انتبهي تحاولي تطنيشها..اوالتغاضي عنها لأنك بصراحه راح تعطي لزوجك عنك صوره انك ضعيفه وما تقدري تدافعي عن حبك له..(حاولي تعطيها كلمتين مختصره وبأدب توقفيها عند حدها قدام زوجك عشان يحس بالفخر وهو ماشي معاكي ويحس بغيرتك عليه..

· لاتفتشي جوال زوجك او لاب توب حقته اومحفظته او ملابسه او شنطته او مكتبه او أي شي يخصه..لأنه راح يحس انك ماتثقي فيه وانك ما تحترمي اشياءه الخاصه وممتلكاته االشخصيته ويحس انك انسانه شكاكه ومريضه ومراقبتك له راح تخليه بينك وبينه فجوه راح تكبر مع الايام ويسير يخبي اشياء عنك ويكذب عليكي..(حاولي تلاقي لك حل غير هذا)

· لاتعبري لزوجك عن حالتك النفسيه بشكل مستمر طوول اليوم..مثلا:اوووف انا طفشانه..اوووف انا تعبانه..اوووف انا قرفانه..انتبهي راح يحس بالملل معاكي وبتحسسيه بالمسؤليه والذنب بالي انتي فيه وهو ماله ذنب اصلا..

· لا تكون كلماتك وارائك سلبيه ومتشائمة لمن يكون رايح زوجك يقدم على مشروع او رايح يجيب نتيجة او أي شي في المستقبل خليكي متفائله وادعميه بدعائك له بكلمات تعطيه الامل وتشجعه انه يقولك على أي شي راح يسويه للمستقبل..
· اصرار الزوجه على اعطاءها كلمات الحب والمديح من الزوج..(تخليه يكره الحب)
· احذري من البكاء اليومي والكثير والحساسيه المفرطه لأنها اسلحتك الفتاكه ضده..ولو استخدمتيها دايما معه ماراح تسير تأثر فيه لأنه تعود عليها..

· احذري عندما يطلبكي زوجكي للسرير ان تظهري عدم رغبتك في كل مرره بدافع انك مؤدبه وانه عيب ..لاانتبهي ترا الزوج يكره الجنس اذا ما جا برغبة الزوجه..
· واخيرا لا تكوني سطحية جدا في حديثك مع زوجك خليكي انسانه مثقفه تتكلمي وتعلقي على اخر الاخبار سواء السياسيه او الرياضيه او العامه لأنه بكذا راح تخليه مايمل الحديث معك ويرتاح لاارائك..ويحسك كصديقه له..

واخيرا اتمنى لكل زوجه السعاده والتوفيق في حياتها..وصلى اللهم وبارك على افضل الخلق سيدنا محمد..عليه افضل الصلاة واتم التسليم..
mangooool