ارجوكن ساعدوني تركت زوجي والمنزل بسبب امه
مساء الخير حبايبي
ابي حل حق مشكلتي
مشكلتي وبكل بساطه سببها زوجي وامه . يمكن تستغربون لو قلت لكم انهم طيبين وحلوين بس بجزائها لكم عشان افهمكم بشكل صحيح :
اولا زوجي :
انسان طيب وكريم ومرح مع الكل بس عيبه شي واحد يقول ما لا يفعل ..
لانه من قبل الزواج شرطت عليه مسكن مستقل وان يوفره لي بحال صارت مشاكل بسكني مع اهله ووعدني ان محد له شغل فيني من امه لين خواته ولكني اكتشفت ان العكس صحيح . كل ما تصير مشكله بيني وبين امه حتى مع وجوده يسكت وما يرد ويقول لي هاي امي للعلم انها هي اللي تبدا المشكله وثاني مشكله معاه سالفة الانجاب . كل ما فاتحته بالموضوع يقول لي مو وقته ويسبب لي مشاكل مع امه اللي تلح علي انا .. لدرجة ان لما كلمته ان مر علينا اكثر من سنة بدون اطفال هددني بالطلاق ..
الثانية امه :
عبارة عن امراة طيبة وما انكر بس شنو عيبها .. انها تخنقني وتلح علي بالحمل والفحص .. سويت فحوصات ما خليت مستشفيات ولا عيادات كلهم قالو اني بخير بس ما تصدق وما تقتنع وجا ذاك اليوم اللي عملت لي مشكله بها الموضوع قدام الضيوف وقلت لها بدون خوف ان ابنك رافض وقلت امامه وقال لها صح انا رافض قالت لي انتي كذابة ولدي يتستر عليكي وانتي الي فيكي العيب ..
ما اكتفت بها الشي انما قالت لكل الموجودين ومن غير النقزات والملاحظات اللي ترميها علي .. مثلا تقول انا اللي زوجتها ولدي وتكبرت واللي يقهر ان زوجي ساكت وما وفى بوعده وتحملتها سنة و ست شهور وتحملت تصرفاتها وبرود زوجي .. بعدها قلت له خلاص ما ابي اقعد اكثر معاك لان امك تدخل بحياتي وانت ساكت .. وانت خربت حياتي بسكوتك ووعودك الكذابة ان محد له شغل بحياتنا وقررت اني اقعد ببيت ابوي مع انه يلح علي اني ارجع بس انا تحملت ما فيه الكفاية منهما …
اولا زوج ما يبي يعالج وثانيا ام زوجي تكذبني وتقول العيب مني للعلم انها شافت كل تقاريري .. وعارفة اني سليمة .. وانا شاكة ان زوجي فيه شي وما يبي يقول لي دليل انه هددني بالطلاق لو فاتحته بموضوع الانجاب وبنفس الوقت ما يمنع تدخل امه بمسالة الانجاب يخليها تغثني وهو يسكت ..
صراحة يا بنات ما ابي ارجع طول ما امه موجوده هناك للعلم ان امه ندمت على الحركه لان من يوم انا في بيت ابوي صار حال ولدها سيء بدوني وهي ما تحب تشوفه بها الحال .. وطلبت من الكل انه يكلمني عشان ارجع .. بس انا ما اقدر اسامحهم لاني صبرت وايد عليهم وما عاد اقدر اصبر اكثر .. وانا ابي استقل بحياتي بس ظروف زوجي ما تسمح ان احنا نسكن لحالنا ..
عطوني حل شاسوي ؟؟؟ سامحوني على الاطاله وجزيتم خيرا
